ترتيب شقة العروس

ترتيب شقة العروس

شقة العروس وترتيبها هي وجه المنزل للعروسة الجديدة فيجب الاهتمام به من كل جانب علي أجمل وجه ومن الأفضل أن يتم البدء فيها قبل الفرح بأسبوع واليكم طريقة ترتيب وتنظيم شقة العروسة
أول شرط أن لا يتواجد عدد كبير من الأفراد للفرش يعني تكون العروسة وأختها واثنين وثلاثة من صحاب العروسة ومامتها بلاش التكتير من العدد عشان هيبق تضيق وقت علي ألفاضي ولازم العروس تكون مركزة فمكان كل حاجه بتترص
والشرط الثاني أن يكون ذوقهم واستايلهم مقرب من ذوقك وعندهم القدر علي التنظيف بطريفة حرفية
الشرط الثالث والأخير ممنوع تواجد الأطفال نهائيا
عليكي إحضار بعض الأدوات التالية معاكي ودي بتكون غير أدوات والحاجات الخاصة بشقتك احضري الأتي :
تحظري معاكي أي وجبات واكل سريع عشان أكيد مش هتستخدمي أدواتك المطبخية الجديدة
وطبعا بيبق معاكي طقم لتنظيف
أما بالنسبة للأدوات والمستلزمات إلي هتحتاجيها وطبعا مش هتكون من حاجتك خديهم من البيت معاكي هتقومي بتجهيز وإحضار الحجم الكبير من  الاريال خدي سفنجة مواعين وخدي بريل وتحضري بخاخه فاضيه ولو أمكن جلانس وياريت تاخدي ديتول أو أي مطهر وتحضري ورق جرايد واحضري فوطة مطبخ نظيفة
أما المساحة والمقشة والزعافة وجردل النظافة ممكن تستخدمي بتوعك مفيش مشكلة
تتأكدي لو أي حاجه ناقصة من أدوات منزلك من مفارش وأي أدوات وتحضريه
أول حاجه عند دخول المنزل تبدوا بتقسيم المهمات عليكم يعني كل واحد مسؤالة عن مكان ويفضل أن العروسة تبق مسؤالة عن اوضة النوم أو حد معاها بس تعرف أماكن كل حاجه بس يفضل إلي هيعمل اوضة النوم يكون قريب منك عشان أدواتك الخاصة

بالنسبة للبراويز لو فيه يبق تتركب كلها وتتعلق أما الستاير ده هيبق في مرحلة التنظيف وسبب تعليق البراويز عشان دقها هيبوظ الدنيا فيفضل في الأول أما لو كانت متعلقة في الأساس يبق يفضل أنها تتغط بملاية قديمة عشان تحميها من أي تراب بعد كده نبدأ مراحل كل غرفة
?غرفة النوم
-هنبدأ بالتأكيد بغرفة النوم لان بيكون اكبر شغل فيها وطبعا تحرصي انك تقسمي الدولاب ويبق في جزء لزوجك وبعد كده بالنسبة للدولاب
هتبدأ بفوطة نظيفة وتمسحي أرفف الدولاب
بعدها بتقومي بتقسيم المفارش علي أرفف الدولاب وتاخدي مقاس رف واحد وتكرري المقاس عليها وتجهزيهم وتفرشيهم مرة واحدة
وبعد كده تبدأ في الرص وعلي حسب ذوقك ولو في حد معترف في موضوع الرص يفضل هي إلي تعملها ومن المفضل أن تكون ملايتك وكوفرتاتك تكون فوق وأيضا اللحاف والمفارش وده علي حسب أما بالنسبة لهدومك والفوط تكون قريبة من أيدك عشان تساعدك في الاستخدام
بالنسبة للبطاطين لو في مساحة في دولابك يبق تمام يتحطوا فيه أما لا يتواجد مساحة فممكن تحت السرير أو إذا تواجد دولاب غرفة الأطفال يفضل تضعي مثلا هدوم الصيفي أنتي وزوجك هنا والشتوي في دولاب الأطفال أو العكس حسب الموسم وبكده هتوفري مكان تحطي فيه جزء من البطاطين والجزء الثاني في دولاب الأطفال وطبعا تحرصي علي النظام ومنظر الدولاب يكون منظم في الأخر بأجمل شكل
-نأتي إلي الشوفنيرة
وهي تتواجد مع غرفة النوم ودي ممكن تستخدميها في رص الحجات الخفيفة الصغيرة يعني مثلا ممكن في شربات زوجك أو في طرحك وممكن الجزء إلي تحت يستخدم في التخزين وممكن أيضا تضعي عليها من فوق تلفزيون صغير ويبق زى مكتبة في اوضة النوم أو قطعة انتيكة حسب رغبتك
-نأتي بقي إلي التسريحة
تبدئي بمسحها ومسح مرايتها بالملمع وبعدها تقومي بفرش مفارشها الخاصة ومن ثم تبدأ في رص الميك أب الخاص بيكي وحاجتك فيه ولازم تحرصي علي تنوع الحجات إلي يتم ترصيصها مش شرط الكمية الشرط تنوعهم
يعني مثلا لو جابية علبتين ايشادوا يفضل وضع واحدة وزيهم الباقي لو أقلام تحديد أو الكحل يعني مش شرط كله جزء منهم ليصبح متنوع من كل الأنواع  وطبعا مش شرط يبق كثير وزى المعرض لا الشرط الرقة والأناقة في الترتيب والخفة
أما بالنسبة أدراج التسريحة دي بقي تستغليها في رص باقي أدوات الميك أب وأدوات العناية الشخصية ليكي ومتعلقات ومتعلقات زوجك
-أما بالنسبة إلي الكومدينو
فهو ممكن تستغليه في تخزين أي حاجة وغير كده تبدأ بمسحة من فوقه وتفرشي مفرشه الخاص وحسب رغبتك تقومي بوضع اباجورة أو لا ده يرجع لرغبتك
أما بالنسبة إلي فرش ماشيات غرفة النوم والسجاد فيفضل أن تقومي بها قبل الفرح بيوم أو يومين وكده تكون غرفة النوم خلصت

?غرفة الأطفال
هتقومي بتنظيفها كويس وتقومي بفرض الملايات الخاصة بها ومفارشها أيضا وبالنسبة للدولاب وتحطي فيه أي حاجه زيادة من غرفة النوم وتفرشي الدولاب بمفارش وتبدأ الرص
وبعدها تحطي انتيكات الغرفة وطبعا مسحها جيدا وتقومي بالبدء في فرش الماشيات والسجاد الخاص بها ومن ثم تقومي بكنسه بالمكنسة ومن ثم تغلقي الغرفة وقد تكون انتهت
?غرفة السفرة
وطبعا دي اكتر مكان بياخد وقت في الرص ليصبح أنيق
هتبدأ بالبوفيه والبار
بالتأكيد هتفتحي البوفيه وتمسحيه كويس بفوطه وتفرشي مفارشك وبالنسبة للمفارش البلاستيك تحطيها في الأدراج في البوفيه من تحت
وبعدها ابدأ بالرص ابدأ بطقم الصيني طبعا عشان كرتونته كبيرة وواخد مكان ومطل المكان وعشان تستغلي كرتونته بعدها بتجميع باقي الكراتين بيها أو أي ورق بيطلع من الرص
ترصي معظم الصيني في البوفيه
وهتخلي حجات بسيطة للنيش علي جمب يعني حوالي طبقين من كل حجم وطقم الشاي والقهوة والسوسييره أو سلطانية الشوربة الكبيرة إلي بتتحط في النصف والباقي هيكون في البوفيه
وبعدها هتقومي برص أي طقم منفعش يترص في النيش أو زيادة في النيش وده هيكون حسب حاجتك الموجودة
بالنسبة لإدراج البوفيه دي ترصي فيها أجزاء من شنط المعالق إلي لو مكنش ليها مكان أو رصي فيها أطقم معالق فردانية قيمة كده مثلا أو ممكن ترصي أي حاجه تحبيها علي حسب رغبتك
?النيش
هتبدأ بمسح الأرفف بتاعته وتلميعها من برا وجوه وبعدها تمسحي الخشب بملمع الخشب طبعا وبعدها تبدأ بفرش المفارش الخاصة به
تبدأ برص كأساتك القيمة فقط
مش كل الكاسات القيمة فقط وكذلك أطقم الشاي والخشاف والقهوة والشاي وطبعا كلهم يكونوا شيك وقيمة وممكن تضيفي في الأركان والنصف ورد مجفف
بلاش تزودي العدد وتكلعكي في الرص بالذات النيش لان كل ما بيكون اخف بكون أنيق اكتر وبينور أكثر وترصي باقي الجزء الصيني
وتزينيه بكريستال وانتيكات صغيرة وبعد الانتهاء يتم غلق النيش براحة
طرابيزه السفرة
تقومي بتنفيض كراسيها كويس ويتم تلميع السفرة وفرش مفارشها ويتم وضع الانتياكات عالبوفية وعالسفرة
بالنسبة للسجاد المفترض أنها تتحط قبل السفرة ولو مش اتحطت هتبدأ بالمسح والفرش وبعدها تقفلي الاوضة لو اوضة مفتوحة يبق تسيبي المسح والفرش في الأخر مع بعضوا
?الانترية
هتبدأ بتنظيف الكنب بالراحة وترصي الخداديات وتمسحي الطرابيزة وتفرشي مفرشها وتمسحي مكتبة التلفزيون وتفرشي مفارشها وابدأ برص الكتب والانتكات وجهاز التلفزيون أو علي حسب رغبتك وبعدها تمسحي الاوضه وتتفرش بالسجاد وتكنس بعدها بالمكنسة

?الصالون
مش هيختلف كتير هتنفضية وتمسحيه وبعدها الغرفة تتمسح وتفرشي السجاد وتكنس والطربيزة تتمسح ويتحط مفرشها وبعدها انتيكاتها ويقفل
 ?المطبخ
هيتم تنظيف الأرفف والأدراج والخشب يتمسح أو الالومنتال من بره وبعدها يتم فرش مفارشه وتبدأ بالرص علي حسب حاجتك وكمياتك وحسب الأجهزة وحجم المطبخ كل ده حسب رغباتك  أهم حاجه تحولي تقربي الحجات إلي تستخدم علطول منك وقريبه منك زى الخلاط وتقم التوزيع وطقم التوابل وحامل المجات والصواني وبعدها ترصي بقي الثلاجة والتوابل والخزين وأطقم الحلل والصواني تبق تحت في التقفله وبالنسبة للمقشة والمساحة في دولاب أدوات التنظيف وتنظفي البوتاجاز والحوض والرخام تنظيفهم كويس وتفرشي الماشيات بقي
وبالنسبة للبلكونة تتغسل كويس ويتعلق أحبالها وتتقفل

 ?الحمام
تبدأ بتنظيف البانيو والتواليت ومسح السيراميك وتلميع مراية الحمام وترصي الحجات علي الاستاند بتاع الشامبوهات إلي علي الجنب لو المتعلق وتبدأ بتعليق ستارة الحمام والبانيو وتمسحيهم
وكده الشقة خلصت ولو لسه سجاد مكنش أتفرش يتفرش وكده خلاص
وياريت في الأخر تبخير الشقة وتشغيل القران الكريم بها .